Фудбалскиот клуб Интер му нареди на својот напаѓач Ромелу Лукаку да го започне режимот на медитеранска исхрана за да се врати на пристојна тежина, пренесува Gazzetta dello sport.
Белгиецот се врати во Миланo на позајмица по една сезона во Челзи. Пред да замине за Англија имаше 101 килограм, но сега неговата тежина е многу поголема.
Лукаку, меѓу другото, ќе јаде риба, салати, њоки, пилешко и тестенини Ширатаки. Нему му е забрането да консумира компири, пржена храна, како и пијалоци кои содржат шеќер и алкохол.
Интер добро знае како изгледа кога Лукаку ќе ја надмине посакуваната тежина, со оглед на тоа дека и претходниот пат кога дојде од Англија, од Манчестер Јунајтед, имаше проблеми со вишокот килограми.
Лукаку следната година ќе игра во Интер како позајмен играч на Челзи.
Пред една година Италијанците го продадоа на лондонскиот клуб за 113 милиони евра.